रुग्णालयांनी धनादेश स्वीकारण्यास नकार दिल्यास आरोग्य सनियंत्रण कक्षाशी संपर्क साधावा -जिल्हाधिकारी सौरभ राव यांचे आवाहन

रुग्णालयांनी धनादेश स्वीकारण्यास नकार दिल्यास

आरोग्य सनियंत्रण कक्षाशी संपर्क साधावा

 -जिल्हाधिकारी  सौरभ राव यांचे आवाहन

पुणे, दि. 21 : जिल्ह्यातील खाजगी रुग्णालयांनी रुग्णांकडून उपचाराच्या रकमेपोटी धनादेश स्वीकारावेत तसेच  शुल्का अभावी कोणाचाही आपत्कालीन औषधोपचार टाळू नये अशा सूचना देत या बाबत रुग्णांना अथवा त्यांच्या नातेवाईकांना सहकार्य मिळत नसल्यास त्यांनी तात्काळ 108 क्रमांकाच्या हेल्पलाईनवर अथवा आरोग्य सनियंत्रण समितीशी संपर्क  साधण्याचे आवाहन जिल्हाधिकारी सौरभ राव यांनी केले आहे.

खासगी रुग्णालयांकडून जून्या 500 व 1000 रुपयांच्या नोटा स्विकारण्यास नकार देण्यात येत असल्याच्या तक्रारी जिल्हा प्रशासनाकडे प्राप्त होत आहेत. याबाबत राज्य शासनाच्या आरोग्य संचालनालयाने सर्व खाजगी रुग्णालयांना रुग्णांकडून धनादेश स्विकारण्याचे आदेश दिलेले आहेत. या आदेशाची काटेकोरपणे अंमलबजावणी करण्यासाठी आरोग्य विभागाला सनियंत्रणाची जबाबदारी देण्यात आलेली आहे. रुग्णांना खाजगी रुग्णालयांकडून सहकार्य मिळत नसल्यास त्यांनी 108 या हेल्पलाईनवर अथवा जिल्हा शल्य चिकित्सक यांच्या 020-27286458 व जिल्हा आरोग्य अधिकारी पुणे यांच्या 020-26051418, 26129965 या क्रमांकावर संपर्क साधावा.

 तसेच या निर्णयाची माहिती देणारा फलक प्रत्येक रुग्णालयांनी त्यांच्या दर्शनी भागात लावण्याच्या सूचनाही देण्यात आलेल्या आहेत. औषधोपचाराबाबत काही तक्रारी प्राप्त झाल्यास आरोग्य विभागाच्या संबंधित अधिकाऱ्याने संबंधित रुग्णालयाकडे संपर्क साधून रुग्णाचे नाव, पत्ता, दूरध्वनी क्रमांक प्राप्त करुन घ्यावेत व रुग्णालयात कोणत्याही परिस्थितीत शुल्काअभावी आपत्कालीन औषधोपचार टळू देवू नयेत. रुग्णांनी अथवा त्यांच्या नातेवाईकांनी संबंधित रुग्णालयातील जबाबदार व्यक्तीचा दूरध्वनी अथवा मोबाईल नंबर घ्यावा, जेणेकरुन त्यांना धनादेश स्विकारण्यास मदत होईल. तसेच एखाद्या रुग्णाने उपचार घेतलेल्या रुग्णालयास दिलेला 10 हजार रुपये पर्यंतचा धनादेश न वटल्यास या धनादेशाची प्रतिपूर्ती मुख्यमंत्री सहाय्यता निधीतून करण्यात येणार आहे.  

*******