पुणे दि. 31 :- अल्पसंख्याक समाजातील नागरिकांची सर्वांगीण प्रगती व्हावी यासाठी, केंद्र व राज्य शासनातर्फे विविध लोककल्याणकारी योजना राबविण्यात येतात. या योजना अल्पसंख्याक समाजापर्यत पोहोचवून त्यांना लाभ मिळवून द्यावा, असे निर्देश अल्पसंख्याक आयोगाचे अध्यक्ष हाजी अरफात शेख यांनी आज येथे अधिकाऱ्यांना दिले.
प्रधानमंत्री पंधरा कलमी कार्यक्रमाद्वारे अल्पसंख्याकासाठी
योजना राबविण्यात येतात. महाराष्ट्र राज्य अल्पसंख्याक आयोगाचे अध्यक्ष श्री.हाजी अरफात शेख यांनी या योजनांच्या अंमलबजावणीचा आढावा आज जिल्हाधिकारी कार्यालयात झालेल्या बैठकीत घेतला, त्यावेळी अधिकाऱ्यांना मार्गदर्शन करताना ते बोलत होते. बैठकीला जिल्हाधिकारी नवल किशोर राम, निवासी उप जिल्हाधिकारी डॉ.जयश्री कटारे, उपजिल्हाधिकारी विजयसिंह देशमुख, श्री. शहजाद खान, स्वीय सहायक गणेश सुरवसे उपस्थित होते.
श्री.हाजी अरफात शेख यावेळी म्हणाले, विविध योजनांची अंमलबजावणी करुन अल्पसंख्यांक समाजाचा विकास व्हावा यासाठी प्रधानमंत्री पंधरा कलमी योजना कार्यक्रमाची अंमलबजावणी करण्यात येते. या कार्यक्रमाची प्रभावी अंमलबजावणी करुन, अल्पसंख्याक समाजाचा विकास करावा. अल्पसंख्याक समाजासंदर्भात समाज माध्यमातून गैरसमज पसरवणाऱ्या संदेशांना संबंधित यंत्रणांनी वेळीच पायबंद घालावा. पंधरा कलमी कार्यक्रमाची माहिती अल्पसंख्याक समाजातील नागरिकांना करुन देतानाच योजना राबविण्यात कसूर करणाऱ्या अधिकाऱ्यांवर कठोर कारवाई करण्यात येईल असे त्यांनी सांगितले.
बैठकीत डॉ.झाकीर हुसेन मदरसा आधुनिकीकरण योजना, मौलाना आझाद मोफत शिकवणी योजना, अल्पसंख्याक शाळांचा पायाभूत विकास, नई रोशनी योजना, नया सवेरा योजना, शिष्यवृत्ती योजना, वसतिगृह योजना, वक्फ मालमत्ता, मौलाना आझाद आर्थिक विकास महामंडळ, मोहल्ला समिती योजनांचा अध्यक्षांनी आढावा घेतला. हज यात्रेकरुंसाठी पुणे येथे हज हाऊस बांधणे तसेच ऊर्दू भवन बांधणे यासाठी प्रस्ताव सादर करण्याच्या सूचना यावेळी त्यांनी जिल्हा प्रशासनाला दिल्या. योजनांच्या अंमलबजावणीचा नियमित आढावा घेण्यात येईल असे जिल्हाधिकाऱ्यांनी यावेळी सांगितले. विविध संघटनांतर्फे यावेळी योजनांच्या अंमलबजावणीसंदर्भात अध्यक्षांना निवेदने दिली. बैठकीला महसूल विभाग, जिल्हा परिषद, पोलीस विभाग, आरोग्य विभागाचे अधिकारी, विविध संघटनांचे पदाधिकारी उपस्थित होते.
00000
